वीरेन्द्रनगर– टिप्परको ठक्करबाट मृत्यु भएका युवकका परिवार तथा आफन्त र स्थानीय प्रशानबीच भएको सहमति पछि कर्णाली प्रदेशको राजधानी सुर्खेत (वीरेन्द्रनगर)को अवस्था सामान्य बन्दै गएको छ ।

बुधबार बिहान मृतकका आफन्त र स्थानीय प्रशासनका प्रतिनिधिबीच भएको वार्तामा पीडित पक्षले बुधबार दिनभर कुनै अराजक गतिविधि र प्रदर्शन नगर्ने सहमति जनाएको छ ।

भे १ ख २२४२ नम्बरको टिप्परको ठक्करबाट मंगलबार कालिकोटको महावै गाउँपालिका–३ का २० वर्षी केशर सिंहको मृत्युपछि वीरेन्द्रनगर तनावग्रस्त बनेको थियो ।

घटना भएलगत्तै प्रहरीले चालक र टिप्परलाई नियन्त्रणमा लिएर अनुसन्धान थालेको थियो ।

मृतक युवका आफन्त र स्थानीयहरुले भने मंगलबार वीरेन्द्रनगरको मुख्य बजार क्षेत्र बन्द गराउँदै तोडफोड गर्न थालेपछि स्थानीय प्रशासनले बुधबार बिहान ६ बजे सम्मका लागि कर्फ्यू आदेश जारी गरेको थियो ।