काठमाडौं- काठमाडौंमा जारी शहीद स्मारक ए डिभिजन लिग अन्तर्गत आज मनाङ मर्स्याङ्दी क्लब र संकटा क्लबबीच प्रतिस्पर्धा हुँदैछ ।

मनाङ र संकटा गत सिजनका विजेता र उपविजेता टोली हुन् । यी दुई टोलीबीचको खेल ललितपुरको सातदोबाटोस्थित एन्फा कम्प्लेक्समा दिउँसो ३ बजे सुरु हुनेछ ।

लिगमा अपराजित रहेको मनाङ संकटाविरुद्ध जित निकाल्दै उपाधि होडमा बलियो बन्ने दाउमा देखिएको छ ।

मनाङका प्रशिक्षक धनेश्वर प्रजापतिले भने, ‘हामी अपरजित छौं । संकटाविरुद्ध लक्ष्य तीन अंकको हुनेछ । अंक तालिकामा यथास्थितिमा रहन जित्नैपर्ने दबाब छ ।’

मछिन्द्रसँगको खेलमा झगडामा मुछिएका दुई खेलाडीलाई आज मनाङ मैदानमा उतार्न पाउने छैन । एन्फाले अशोक बराल  तथा जगजित श्रेष्ठमाथि कारबाही गरेको छ ।

संकटा पनि मनाङलाई रोक्ने दाउमा रहने छ । संकटाका प्रशिक्षक विजय महर्जनले भने, ‘ हाम्रा खेलाडी लयमा छन् । जित्नका लागि खेल्छौं ।’

लिगमा ८ खेल खेलेको संकटाको १२ अंक रहेको छ । ३ जित निकालेको संकटा आठौं स्थानमा छ । मनाङलाई पराजित गरेको खण्डमा संकटा पाँचौं स्थानमा उक्लने छ ।