दोहा– फाइजर र बायोएनटेक कम्पनीले निर्माण गरेको कोरोनाविरूद्धको खोप (भ्याक्सिन) ओमानमा पनि सुरु भएको छ । खोप सुरु भएसँगै ओमानका स्वास्थ्य मन्त्री डा. अहमद बिन मोहम्मद अल-सैदीले कोरोनाविरूद्धको पहिलो खोप लगाएका छन् ।

पहिलो चरणमा फ्रन्टलाइन काम गर्नेहरु, दीर्घकालीन रोग भएका व्यक्तिहरू, वृद्ध, मधुमेह रोग, दीर्घकालीन फोक्सोको रोग भएका व्यक्तिहरूलाई खोप दिइनेछ ।

ओमानको स्वास्थ्य मन्त्रालयले ६० प्रतिशत जनसंख्यालाई खोप दिने रणनीति तयार गरेको छ, जसलाई विभिन्न चरणमा विभाजन गरी खोप अभियान सञ्चालन गर्ने जनाएको छ ।

दोस्रो ब्याचको भ्याक्सिन आगामी जनवरीसम्ममा आइपुग्ने जनाएको छ । ओमानमा कार्यरत नेपालीसहित आप्रवासी कामदारले पनि यो खोप पाउने छन् । मन्त्रालयले तोकेको ४० स्वास्थ्य केन्द्रहरु मध्ये आफूलाई पायक पर्ने केन्द्रबाट खोप लिन सकिने जनाएको छ ।

ओमानमा यो समाचार तयार पार्दासम्म कोरोना सङ्क्रमित हुनेको सङ्ख्या १ लाख २८ हजार ४७२ पुगेको छ । उपचारपछि निको हुनेको सङ्ख्या १ लाख २० हजार ९७६ पुगेको छ भने मृत्यु हुनेको सङ्ख्या १ हजार ४९५ जना रहेको त्यहाँको स्वास्थ्य मन्त्रालयले जनाएको छ ।