काठमाडौं – हास्यकलाकार मनोज गजुरेललाई कोरोना संक्रमण पुष्टि भएको छ ।

गजुरेलले सामाजिक सञ्जालमार्फत आफू कोरोना संक्रमित भएको जानकारी दिएका हुन् । उनले आफूमा सामान्य लक्षण देखिएको र बिहीवारदेखि होम आइसोलेसनमा बसेको बताएका छन् ।

‘संक्रमणबाट बच्न सुरक्षाका सम्पूर्ण उपायहरु अपनाउँदा अपनाउँदै पनि यो जुनसुकै बेला जसलाई पनि लाग्न सक्ने रहेछ,’ गजुरेल भन्छन्, ‘आफू सचेत रहन, अरुलाई सुरक्षित रहन तथा पोजेटिभ देखिए पनि नआत्तिन, विश्वासिलो चिकित्सकको सम्पर्कमा रहन अनुरोध छ ।’

गजुरेलले आफ्ना दाइ र आफू संक्रमित भएको पुष्टि भए पनि छोराछोरीमा कुनै लक्षण नदेखिएको जानकारी दिएका छन् ।

‘मलाई विश्वास छ, मेरो शरीरमा प्रवेश गरेको यो भाइरस मेरो शारीरिक, मानसिक र आध्यात्मिक शक्तिभन्दा बलियो पक्कै छैन, त्यसैले मैले यो भाइरसलाई आफ्नो शक्तिशाली इम्युन सिस्टममा स्वागत गरिसकेको छु,’ उनी भन्छन् ।