काठमाडौं – नेपाली राष्ट्रिय क्रिकेट टोलीका लेग स्पिनर सन्दीप लामिछानेले कोरोना परीक्षण गराएका छन् । मंगलबार सन्दीपले सानेपास्थित स्टार अस्पतालमा कोरोना परीक्षण गराएका हुन् ।

लामिछानेका व्यवस्थापक रहेका रमन सिवाकोटीले भने, ‘सन्दीपले आज स्टार अस्पतालमा कोरोना जाँच गराएका हुन् । रिर्पोट भोलि (बुधबार) आउँछ ।’

क्यारेबियन प्रिमिरय लिग (सिपीएल) खेल्न जाने तयारीमा रहेका लामिछानेले आज कोरोना जाँच गराएका हुन् ।

सिपीएल खेल्न जाने तयारी गरिरहेका लामिछाने जाने नजाने निश्चित भने भइसकेको छैन । यद्यपि व्यवस्थापक सिवाकोटीले लामिछाने सिपीएल खेल्न जाने प्रक्रियामा रहेको बताएका छन् ।

लगातार तेस्रो संस्करणको सिपीएल खेल्ने तयारीमा रहेका लामिछाने यो वर्ष जमैका तल्लावार्जबाट खेल्नेछन् । यो वर्षका लागि तल्लावार्जले लामिछानेलाई १ करोड ३० लाख नेपालीमा टोलीमा आवद्ध गरेको छ ।

सिपीएल अगस्ट १८ देखि सुरु हुँदैछ ।