मुम्बई – कोरोना भाइरसको प्रकोपका कारण केही महिनायता फिल्म र टिशी शो का शूटिङ हुन सकेका थिएनन् । अब भने फिल्मको शूटिङ गर्न थालिएको छ ।

बलिउड अभिनेता जोन अब्राहम स्टारर फिल्म ‘सत्यमेव जयते २’ को पनि छायांकन थालिने भएको छ । यो वर्षको अप्रिलमा रिलिज गर्ने भनिएको फिल्म कोरोना भाइरसका कारण रोकिएको थियो ।

खबरका अनुसार अब यो फिल्मको शूटिङ सेप्टेम्बरबाट शुरु हुनेछ । निर्देशक मिलाप जावेरी र जोन अब्राहम फिल्मको छायांकन गर्न उत्साहित भएका छन् । फिल्मको शूटिङ सेडुअल पनि तयार पारिएको छ ।

हालै एक अन्तर्वार्ताका क्रममा मिलापले लकडाउनका बेला फिल्मको स्क्रिप्टमा थप काम गरिएको बताएका थिए । स्क्रिप्टमा आएको परिवर्तनसँगै फिल्मको शूटिङ लखनउमा हुने बताइएको छ ।

एक्सन प्याक कप ड्रामामा आधारित यो फिल्म पहिले मुम्बईमा शूटिङ गर्ने भनिएको थियो ।

सन् २०१८ मा रिलिज भएको फिल्म ‘सत्यमेव जयते’ ले दर्शकबाट चर्चा बटुलेको थियो । फिल्ममा प्रयोग गरिएको एक्सनका कारण फिल्मको चर्चा भएको थियो ।