मुम्बई – अभिनेता सुशान्त सिंह राजपूतले आत्महत्या गरेपछि बलिउडमा नेपोटिज्ममाथि बहस भइरहेको छ । बलिउडमा गुटबन्दी र नातावाद हाबी भएको भन्दै टिप्पणी हुन थालेको छ ।
फ्यान तथा केही सेलिब्रेटीले आलिया भट, सोनाक्षी सिन्हा, करण जोहर लगायतका सेलिब्रेटीले गुटबन्दी गरेको र अरु कलाकारलाई पाखा लगाएको आरोप लगाएका छन् ।
बलिउड अभिनेता सलमान खानलाई पनि फ्यानले गाली गरेका छन् । सामाजिक सञ्जाल इन्स्टाग्राममा आलिया भट, सोनाक्षी सिन्हा लगायतले कमेन्ट गर्न नमिल्ने बनाएका छन् ।
हालै सलमानले इन्स्टाग्राममा एक पोस्ट शेयर गरेका थिए । उनले वर्कआउट गरेपछिको तस्वीर शेयर गरेका छन् ।
उक्त तस्वीरमा फ्यानले सलमानलाई नराम्रोसँग गाली गरेका छन् । अक्सर सलमान खानले यसरी तस्वीर शेयर गर्दा फ्यानले तारिफ गर्ने गर्थे ।
सुशान्त सिंह राजपूतको आत्महत्यापछि भने उनलाई गाली गर्ने फ्यानको संख्या बढेको छ ।
कतिले त सलमान खानमै ‘खुनी’ भनेरै कमेन्ट छोडेका छन् । सलमान खानको उमेर बूढो भइसकेको आरोप फ्यानले लगाएका छन् ।
उनको तस्वीरमा सकारात्मकभन्दा बढी नकारात्मक कमेन्ट आइरहेका छन् । धेरैले अब सलमान खानलाई ‘रिजेक्ट’ गर्नेसमेत बताएका थिए ।
केहीले भने नकारात्मक सोच भएका व्यक्तिबाट टाढा रहन सलमानलाई सुझाएका पनि छन् ।
बलिउडमा प्रायः चर्चामा रहने सलमान खानले केही समयअघि लकडाउनका बेला एक म्युजिक भिडियो सार्वजनिक गरेका थिए । सुशान्तले गत जुन १४ मा झुण्डिएर आत्महत्या गरेपछि सुशान्तका फ्यान सलमानमाथि खनिएका छन् । सामाजिक सञ्जालमा उनका फलोअर पनि घटेका छन् ।
प्रतिक्रिया