काठमाडौं । सरकारले कृषकलाई सहुलियत ऋणको ग्यारेन्टी गर्न किसान क्रेडिट कार्ड लागू गर्ने घोषणा गरेको छ ।

आगामी आर्थिक वर्षको बजेट घोषणा गर्दै अर्थमन्त्री डाक्टर युवराज खतिवडाले कृषिमा श्रम परिचालन गरी रोजगारी सिर्जना गरिने जानकारी दिएका छन् ।

बालीको सम्भावनाका आधारमा ठूलो परिमाण उत्पादन गर्न प्रोत्साहन गर्ने र कृषिमा आत्मनिर्भर बनाउने, दुध तरकारी र मासुमा आत्मनिर्भर बन्ने गरी बजेट विनियोजन गरिने, एक स्थानीय तहमा एक उत्पादन पकेट क्षेत्र पहिचान गर्नका लागि ३ अर्ब २२ करोड बजेट विनियोजन गर्ने उनले बताए ।

सबै स्थानीय तहमा घुम्ती प्रयोगशालामार्फत् माटो परिक्षण गर्ने, रासायनिक मल समयमै उपलब्ध गराउने, विउको गुणस्तर परीक्षण गर्ने, कृषि उपजको बजारीकरण गर्ने, चोभारमा हाटबजार आगामी आर्थिक वर्षमै शुरु गर्ने, १ अर्ब दिएर सबै स्थानीय तहमा खाद्य भण्डार बनाउने ७८ वटा कृषि बजार निर्माण गर्ने, खाद्यान्न बैकको अवधारणा कार्यान्वयन गर्ने, सबै स्थानीय तहमा कृषि र पशु प्राविधिक परिचालन गरिने, कृषि बाली र पशुपंक्षी विमा गर्न सहयाग गर्ने लगायतका योजना सरकारले सार्वजनिक गरेको हो ।

त्यस्तै ५० लाख कृषि र वन क्षेत्रका ५५ लाख विरुवा वितरण गर्ने र मुख्य सिमानाकामा पश् क्वारेन्टाइन स्थापना गर्ने समेत सरकारले घोषणा गरेको छ ।

सबै किसानलाई सहुलियत ऋणको ग्यारेन्टी गर्न किसान क्रेडिट कार्डको शुरुवात गर्ने समेत सरकारले घोषणा गरेको छ ।

२ अर्ब ३२ करोड सिंचाईका लागि विनियोजन गरेको सरकारले २२ हजार हेक्टर सिंचाइ आगामी आर्थिक वर्षमा गर्ने घोषणा गरेको छ । १० अर्ब २५ करोड महाकाली सिचाई आयोजनाका लागि विनियोजन गरेको छ ।