काठमाडौं- योहो टेलिभिजनले पहिलो वर्ष पूरा गरी दोस्रो वर्षमा प्रवेश गरेको छ । गणतन्त्र दिवस र सगरमाथा दिवसको अवसर पारेर गत वर्ष स्थापना योहो टेलिभिजन प्रसारण आरम्भ भएको थियो ।

टेलिभिजनले पहिलो वर्षमा निकै सफलता हात पारेको भन्दै टेलिभिजनका अध्यक्ष आङकाजी शेर्पाले छोटो अवधिमै उचाइ लिन सफल भएकोमा खुसी व्यक्त गरे । उनले योहो टेलिभिजनले पत्रकारिताको मूल्य र मान्यताभित्र रहेर टेलिभिजनहरूको भिडमा आफूलाई फरक देखाउने प्रयास गरिरहेको बताए ।

टेलिभिजनका समाचारप्रमुख जीवराम भण्डारीले नागरिकलाई सुसूचित गर्ने र अनियमितता, भ्रष्टाचारविरुद्ध खबरदारी गर्ने दायित्वबाट पछि नहटी टेलिभिजनले काम गर्ने बताए ।

उनले राष्ट्रियता, भौगोलिक अखण्डता, सार्वभौमिकता र आमनागरिकको स्वतन्त्रतालाई अझै बलियो बनाउन टेलिभिजनले भूमिका खेल्ने बताए ।