काठमाडौं- १० वर्षीया बहिनीकाे उपचारका लागि वीरगन्जका  रियाज खान विभिन्न भौतारिए । ज्वरो आएकी बहिनीको उपचारका लागि उनी वीरगन्जको गण्डक अस्पतालदेखि भरतपुर हुँदै हेटौंडा अस्पतालसम्म पुगेका हुन् ।

गण्डक अस्पतामा बहिनीको उपचार नहुने भएपछि उनी निकै निरास बने । अस्पतालले आईसीयू नभएको भन्दै भरपुर जान सल्लाह दियो । बहिनीको स्वास्थलाई ख्याल गर्दै उनी चितवनस्थित भरतपुर अस्पताल पुगे ।

१५ दिनदेखी ज्वरोले थलीएकी बहिनीलाई लिएर भरतपुर पुगे पनि अस्पतालले बिरामीलाई भर्ना लिन नमानेपछि उनी झन निरास बने । भरतपुर पुगेका उनले त्यहाँका निजी र सरकारी अस्पताल सबै चाहारे पनि कतै सीप चलेन ।

कुनै अस्पतालले रगतको अभाव त कतै आईसीयु उपकरण नभएको लगायतका विभिन्न बहाना बनाएर बिरामीलाई फिर्ता पठाएको उनले गुनासो गरे ।

भरतपुरमा पनि उपचार नहुनेभएपछि उनी बहिनीलाई बोकेर घर फर्कन लाग्दा हेटौँडा अस्पतालमा उपचार हुन्छ कि भनेर त्यहाँ पनि पुगे ।

अस्पतालले बहिनीको उपचार गर्ने जनाउँदै भर्ना गरेपछि निरास बनेका रियाजको आशा पलायो ।

बिरामी बहीनीको उपचारका लागि ३ द‍िनसम्म विभिन्न अस्पताल धाउँदा हेटौँडा अस्पतालले भर्ना लिएपछि भने उनी ढृुक्क बने ।

उनले हेटौंडा अस्पताल प्रशासन र यहाँका चिकित्सकहरुले देखाएको मानवियताप्रति मुक्तकण्ठले प्रसंसा नै गरे ।

अहिले पर्सा जिल्ला कालीमाई गाउँपालिकाका–२ की १० वर्षीया नाजरिन खातुनको हेटौंडा अस्पतालमा उपचार भइरहेको छ ।

उपचारमा संलग्न डाक्टर राजु सेढाइका अनुसार उनलाई एप्लाष्टिक एनेमिया भएको छ । नाजरिनको शरीरमा रगत उत्पादन नभएको र रगतमा हेमोग्लोबिन, प्लेटलेट्सको कमी भएको डाक्टर सेढाइ बताए ।

उनले बिरामीको अवस्था सुधारोन्मुख रहेको समेत बताएका छन् ।

विश्वव्यापी महामारीको रुपमा फैलिएको कोरोनाको त्रासले अस्पतालले ज्वरोका बिरामी भर्ना नै लिन नचाहाँदा बिरामी र आफन्तले शारीरिकसँगै मानसिक पीडा भोगिरहेको खानले बताए ।