काठमाडौं– स्वास्थ्य तथा जनसंख्या मन्त्रालयले मंगलबार कोरोना भाइरसको संक्रमणको पुष्टि भएका दुबै जना भारतबाट आएका व्यक्ति भएको जानकारीदिएको छ ।

नियमित पत्रकार सम्मेलन मार्फत मन्त्रालयका प्रवक्ता डाक्टर विकास देवकोटाले दुई संक्रमित भारतबाट आएकाहरु रहेको जानकारी दिएका हुन् ।

काठमाडौंको टेकुस्थित राष्ट्रिय जनस्वास्थ्य प्रयोगशालामा गरेको परीक्षणमा कोरोना संक्रमण पुष्टि भएको स्वास्थ्य मन्त्रालयले जनाएको हो । उनीहरुलाई अस्पताल लैजाने तयारी गरिएको प्रवक्ता देवकोटाले जानकारी दिए ।

चैत २२ गते कलकत्ताबाट आएका बृन्दावन नगरपालिकाका २४ वर्षीय युवकमा कोरोना संक्रमण देखिएको हो । भने अर्का संक्रमित देवाही गोनाही नगरपालिका९१ निवासी ३५ वर्षीय पुरुष हुन्। उनी पनि वैशाख ४ गते दिल्लीबाट आएका थिए।

मंगलवार थपिएका २ कोरोना संक्रमितसँगै कोरोना संक्रमितको संख्या ५४ जना पुगेको छ । भने हालसम्म १६ जना उपचारपछि निको भएर घर फर्किएको मन्त्रालयले जनाएको छ ।

डा देवकोटाका अनुसार हालसम्म पीसीआर विधिबाट १० हजार ८ सय ७ वटा नमूना परीक्षण गरिएको छ । यस्तै र्‍यापिड डाइग्रोस्टिक टेष्ट (आरडीटी) विधिबाट हालसम्म ४४ हजार १९ वटाको नमूना परीक्षण गरिएको छ ।

डा देवकोटाका अनुसार गत २४ घण्टामा १ हजार १ सय ९३ वटा नमूना परीक्षण भएका छन् । यस्तै हालसम्म दुवै विधिबाट हालसम्म ५४ हजार ८ सय २६ वटा परीक्षण भएका छन् ।

प्रवक्ता डा देवकोटाका अनुसार देशभर २२ हजार ९९ जना देशभरका क्वारेन्टाइनमा रहेका छन् । आज देशभरका विभिन्न अस्पतालमा एक सय ८ जना आइसोलेसनमा रहेको छन् ।

यसैबीच स्वास्थ्य मन्त्रालयका अनुसार शिखर इन्स्युरेन्स कम्पनीले स्वास्थ्य सेवा विभागलाई १७ हजार सर्जिकल मास्क सहयोग गरेको छ ।