काठमाडौं- सत्तारुढ दल नेपाल कम्युनिष्ट पार्टी (नेकपा) भित्रको विवाद समाधान गर्ने उद्देश्यले भएको प्रधानमन्त्री तथा अध्यक्ष केपी शर्मा ओली र अर्का अध्यक्ष पुष्पकमल दाहाल ‘प्रचण्ड’बीचको भेटवार्ता सम्पन्न भएको छ ।

करिब दुई घण्टा लामो भेटवार्तामा ठोस सहमति केही पनि नभएको नेकपानिकट स्रोतले जनाएको छ ।

पछिल्लो विवाद समाधानको लागि अध्यक्ष दाहाल, बरिष्ठ नेताद्धय माधव कुमार नेपाल, झलनाथ खनाल, उपाध्यक्ष वामदेव गौतम, प्रवक्ता नारायणकाजी श्रेष्ठ लगायत नेताले तत्काल सचिवालय बैठक र त्यसपछि स्थायी कमिटीको बैठक डाक्नुपर्ने अडान राखेका छन् ।

पार्टीभित्र उत्पन्न विवादका कारण रक्षात्मक बन्दै गएका ओलीले आफूसँग असन्तुष्ट रहेका प्रचण्डलाई वार्ताका लागि सोमबार दिउँसो एक बजे बालुवाटार बोलाएका थिए।

पार्टीलाई अलग गरी दल विभाजन र संवैधानिक परिषद्सम्बन्धी कानुन अध्यादेशमार्फत संशोधन गर्ने निर्णयबाटपछि हटेपनि ओलीलाई विश्वास गर्ने अवस्थामा प्रचण्डसँगै नेकपाका अधिकांश नेताहरु पुगेका छैनन्।