काठमाडौं –  विश्वले कोरोना भाइरससँग संघर्ष गरिरहेका बेला चीनले विवादास्पद दक्षिण चीन सागरका विभिन्न स्थानको नामाकरण गरेको छ ।

विश्वको सबै भन्दा शक्तिशाली देश बन्ने सपना बोकेको चीनले विवादास्पद उक्त क्षेत्रका ८० स्थानको नाम परिवर्तन गरेसँगै तनाव चुलिने संकेत देखिएको छ ।

यसअघि दक्षिण चीन सागरमा लडाकू विमान पठाएको चीनले गोप्य रूपमा दक्षिण चीन सागरमा ८० स्थानको नाम परिवर्तन गरेको दावीसहितका विवरणहरु बाहिरिएका छन् ।

पुन: नामकरण गरिएका स्थानहरूमध्ये २५ वटा टापु र चट्टानहरू छन् भने बाँकी ५५ वटा समुद्री भूगोल संरचना हुन् ।

चीनले गत हप्ता आफ्नो युद्धपोत र लडाकू जेटहरू समुद्री क्षेत्रमा पठाएको ताइवानले आरोप लगाउँदै आएको छ । जापानले ताइवानको उक्त आरोपमा सत्यता भएको जनाएको थियो ।

चीनले भने उक्त आरोपहरुको खण्डन गर्दै आएको छ । उसले ती क्रियाकलापहरु नियमित सैन्य अभ्यास अन्तरगत भएको बताउँदै आएको छ ।

दक्षिण चीन सागरका विभिन्न स्थानलाई चीनले नामाकरण गरेसँगै ती क्षेत्र उसले जबरजस्ती कब्जा गर्न सक्ने मनसायले अभिप्रेरित भएको आरोप लगाइएको छ ।

ताइवान र जापानसँग यसअघिदेखि नै कटुतापूर्ण सम्बन्ध रहेको चीनको उक्त कदमसँगै दक्षिण चीन क्षेत्रमा तनाव बढ्न सक्ने विश्लेषण हुन थालेका छन् ।

चीनले आफ्नो जलक्षेत्र भनी दाबी गरेको समुद्रलाई ब्रुनाई, मलेसिया, फिलिपिन्स, ताइवान, भियतनाम लगायतका देशहरुले अस्वीकार गर्दै  आफ्नो सार्वभौमिकतामा चीनले दाबी गरेको आरोप लगाउँदै आएका छन् ।