काठमाडौं- प्रधानसेनापति पूर्णचन्द्र थापाले कारोना भाइरसको संक्रमण रोक्न बुद्धि र विवेकको प्रयोग गर्न निर्देशन दिएका छन् ।

उनले कोरोना भाइरसविरुद्धको राष्ट्रिय लडाइँमा सैनिक सहयोगका लागि खटिने सबै दर्जालाई बहादुरी होइन, बुद्धि र विवेक प्रयोग गर्न निर्देशन दिएका हुन् ।

प्रधानसेनापति थापाको दश बुँदे निर्देशन जारी गर्दै भनेका छन् , ‘सरकारले गरेको लकडाउन महामारी फैलिनबाट रोक्न राष्ट्रकै लागि अवसर र चूनौती दुवै हो, नागरिकको सेवामा समर्पित हुँदा आफ्नो सुख सुविस्ता भुली सदैव सर्वाेच्च सेवाभाव देखाउनुहोस् ।’

सेनाको उपस्थितिले मात्रै पनि कतिपय नागरिक आश्स्त हुने भन्दै प्रधानसेनापति थापाले बिरामीले पनि निको भएको अनुभव गर्ने हुनाले नागरिकप्रति सधैँ सदाचार, भद्र व्यवहार र मानवीयता प्रदर्शन गर्न निर्देशन दिएका छन् ।

प्रधानसेनापतिले भनेका छन्, ‘आफ्नो बोली र व्यवहारले मात्रै पनि अरुको सोचमा परिवर्तन ल्याउन सकिन्छ, आ–आफ्नो दैनिकिमा परिवर्तन गर्न सबैलाई अभिप्रेरित गर्नुहोस् ।’

संकटको अहिलेको घडीमा संयम् र धैर्यता देखाउन निर्देशन दिँदै उनले कठिन समय केही समयको लागि मात्रै हो भन्ने सदैव ख्याल राख्न सुझाव दिएका छन् ।