काठमाडौं– कारोना भाइरस (कोभिड–१९) संक्रमणको जोखिम कम गर्न भन्दै अख्तियार दुरुपयोग अनुसन्धान आयोगले आफ्नो हिरासतमा रहेका ८ जना आरोपितहरुलाई रिहा गरेको छ ।

सरकारले यसअघि नै सामान्य प्रकृतिको घटना र कसुरसँग सम्बन्धित आरोपित र अभियुक्तहरुलाई छाड्ने क्रम शुरु गरिसकेको थियो ।

प्रतिनिधिसभाको कानून न्याय तथा मानव अधिकार समितिले पनि कोरोना संक्रमणको जोखिम कम गर्न भन्दै कारागार तथा बन्दी गृहमा भीड कम सरकारलाई निर्देशन दिएको थियो ।

अख्तियार दुरुपयोग अनुसन्धान आयोगका प्रवक्ता प्रदीपकुमार कोइरालाले कसुरको गाम्भिर्यता र अनुसन्धानको पूर्णयता समेतलाई बिचार गरी ८ जना आरोपितलाई धरौटी लिएर तारेखमा राख्ने निर्णय भएको जानकारी दिए ।

‘कोरोना भाइरस संक्रमणको जोखिमलाई मध्यनजर गर्दै कसुरको गाम्भिर्यता र अनुसन्धानको पूर्णता समेतलाई विचार गरी हुनसक्ने सजाय र हिरासतमा बसेको अवधि समेतलाई मध्यनजर राख्दै आयोगको हिरासतमा रहेका मध्ये हाल ८ जनालाई हिरासतमा नराखी बाँकी अनुसन्धान पूरा गर्नेगरी धरौटी लिएर तारेखमा राख्ने निर्णय भएको छ,’ प्रवक्ता कोइरालाले भने ।