सुर्खेत– मंगलबार बिहान ट्रिपरको ठक्करबाट एक जनाको मृत्यु भएपछि तनावपूर्ण बनेको वीरेन्द्रनगरमा स्थानीय प्रशासनले कर्फ्यू आदेश जारी गरेको छ ।

जिल्ला प्रशासन कार्यालय सुर्खेतले सूचना जारी गर्दै साँझ साँढे ६ बजेदेखि बिहान ६ बजेसम्मका लागि कर्फ्यु लगाइएकाे जनाएको हो ।

प्रहरी र प्रदर्शनकारीबीच भएको झडप हुँदा स्थिति तनावपूर्ण बनेपछि प्रशासनले कर्फ्यू आदेश जारी गरेको हो ।

ट्रिपरको ठक्करबाट आज विहान एक जनाको मृत्यु भएको विषयलाई लिएर स्थानीय प्रदर्शनमा उत्रिएका थिए । उनीहरु तोडफोड, आगजनीमा उत्रिएपछि सम्भावित सुरक्षा स्थितिलाई नियन्त्रण लिन कर्फ्यू आदेश जारी गरिएको  सुर्खेतका प्रमुख जिल्ला अधिकारी वसन्त अधिकारीले जानकारी दिए ।

उनका अनुसार वीरेन्द्रनगर नगरपालिकाको पूर्वमा इलाम, पश्चिममा वाङ्गेसिम, उत्तरमा कपासे ब्यारेक र दक्षिणमा ५०० मिटरको दूरीसम्म कर्फ्यू क्षेत्र घोषणा गरिएको हो ।

आज दिउँसो प्रहरी र प्रदर्शनकारीबीच झडप हुँदा स्थिति तनावपूर्ण बनेको थियो ।  स्थितिलाई नियन्त्रणमा लिन प्रहरीले हवाई फायर समेत गरेको थियो ।

प्रहरी र प्रदर्शनकारीबीच भएको झडपमा परी ८ जना भन्दा बढी घाइते भएका छन् ।

कालीकोट महावै गाउँपालिका– ३ सिमखेत घर भएका २० वर्षीय केशर सिंहको ट्रिपरको किचेर आज विहान मृत्यु भएको थियो ।

स्थानीयका अनुसार जुम्लाका २५ वर्षीय महेश गौतम, दैलेखका १६ वर्षीय हिदेशकुमार शाही, दैलेखका १७ वर्षीय कृष्णबहादुर थापा, दैलेखकै १७ वर्षीय गोकुल गिरी, कालीकोटका कमान सिंहलगायत ८ जना घाइते भएका छन् ।