काठमाडौं– समाजवादी पार्टीका संघीय परिषद अध्यक्ष तथा पूर्व प्रधानमन्त्री डा. बाबुराम भट्टराईले संघीय संसद साना तिना बहसमा अल्झिएको भन्दै नवनिर्वाचित सभामुख अग्नि सापकोटाको ध्यानाकर्षण गराएका छन् ।

मंगलबार बसेको प्रतिनिधिसभाको बैठकलाई सम्बोधन गर्दै नेता भट्टराईले संसदमा गम्भीर बहस नै नभएको भन्दै आगामी दिनमा त्यसको शुरुवात हुने अपेक्षा रहेको बताए ।

‘संसद भनेको मुलतः प्रतिपक्षकै हो । विश्वका धेरै देशको संसद सञ्चालन भएको देखेको छु । त्यहाँका सभामुखले प्रतिपक्षको आवजलाई प्राथमिकता दिएको छ । तर हामी गम्भिर बहशमा सहभागी हुँदैनौं । झिनामसिना विषयमा सदन अलमलिएको छ,’ डा. भट्टराईले भने, ‘त्यसैले राष्ट्रिय मुद्धामा जति सदन जिवन्त हुनुपपर्थ्यो । त्यति हुन सकेको छैन ।’

डा. भट्टराईले अमेरिकाले अनुदानका रुपमा प्रदान गर्न लागेको सहयोग सन्भर्दमा भएको एमसीसी सम्झौताको विषयमा समेत सदनमा गम्भीर बहस हुनुपर्नेमा जोड दिएका छन् ।

‘अहिले एमसीसीका विषयमा जसरी छलफल भएको छ, राष्ट्रिय एजेण्डा रुपमा हैन, पार्टीको गुटका आधारमा छलफल, बहश भइरहेको छ, यो गलत हो,’ डा. भट्टराईले भने ।

पूर्व प्रधानमन्त्री भट्टराईले संघीय संसदको सभामुख पदलाई वरियताको आधारमा प्रधानन्यायाधीशभन्दा पनि तल राखेको भन्दै आपत्ति जनाए ।

‘हामी सबैले जनप्रतिनिधिसभालाई उच्च स्थानमा राख्ने गरेको भए पनि राज्यका तीन अंगहरुको स्थान उदारवादी लोकतन्त्रले आफ्नो उदारता भुल्दै गयो, समाजवादी लोकतन्त्रले पनि लोकतन्त्रका कतिपय विषय छाड्दै गयो । प्रतिनिधिसभाको स्थान अलि तल परेको हामीलाई अनुभूत हुन्छ,’ डा. भट्टराईले भने, ‘राज्यको प्रमुख राष्ट्रपति, उपराष्ट्रपति पछि सभामुख उच्च स्थानमा हुनुपर्छ । तर हामीले प्रधानमन्त्रीलाई माथि राख्यौं । तर, अहिले प्रधानन्यायाधीश, जसले संसदले बनाउने कानूनको व्याख्या गर्छ, उसलाई सभामुखभन्दा माथि राखिएको छ । यसमा सभामुखको ध्याना जाओस् ।’