काठमाडौं- अखिल नेपाल फुटबल संघ (एन्फा) ले बंगलादेश टुरका लागि बालगोपाल महर्जनलाई मुख्य प्रशिक्षकको जिम्मेवारी दिएको छ।

एन्फाले बिहीबार महर्जनलाई मुख्य प्रशिक्षक बनाएको हो ।  यसअघि पनि राष्ट्रिय टोलीमा रहेर लामो समय काम गरिसकेका मर्हजन नेपालले बंगलादेशमा खेल्ने दुई मैत्रीपूर्ण खेलमा टोलीलाई प्रशिक्षण दिनेछन्।

मुख्य प्रशिक्षक योहान कालिन स्वीड्नस्थित आफ्नो घर गएको र कोरोना भाइरसको महामारीले गर्दा फर्कन कठिनाई भएपछि महर्जनलाई जिम्मेवारी दिइएको हो।

यस्तै एन्फाले सहायक प्रशिक्षकमा भने किरण श्रेष्ठलाई नै कायम राखेको छ। नेपाल ८ महिनाभन्दा बढी समयपछि मैत्रीपूर्ण फुटबल खेल्दैछ।

कोरोना महामारीमा नेपालले खेल्ने अन्तर्राष्ट्रिय खेल पनि बंगलादेश टुर बन्नेछ। नेपालमा कोरोनाको जोखिम रहेकाले बंगलादेश खेल्न जान लागेको हो। नेपालले बंगलादेशमा यो महिनाको अन्तिम र मंसिर पहिलो हप्ता गरि दुई खेल खेल्नेछ।