सिन्धुली- भारतको विहार हुँदै नेपाल प्रवेश गरेको सलह किरा सिन्धुलीमा पनि देखिएको छ ।

सिन्धुलीका विभिन्न स्थानमा सलह किरा देखिएको कृषि विकास कार्यालय सिन्धुलीले जनाएको छ । सिन्धुलीको कमलामाई नगरपालिका सलह किरा देखिएको कार्यालयले जनाएको हो ।

कमलामाई नगरपालिकाका कृषि शाखाका प्राविधिक सरोज फुयाँलका अनुसार किसानबाट फट्याङ्ग्राजस्तो किराले बालीनालीमा नोक्सान पुर्‍याएको जानकारी दिए ।

शनिबार तराईका विभिन्न सीमानाका हुँदै नेपाल प्रवेश गरेको सलहको एउटा सानो झुण्ड सिन्धुली आइपुगेको उनले बताए ।

जिल्लाको कमलामाई नगरपालिका २ को चियाबारी, सिमबारी, लामिस्वारा, मुडेखर्क, खुर्सानी डाँडा, खोपीखर्क, कनपा ८ को माइस्थान, करकरे र कमलामाई नगरपालिका १० को भिमान तथा भडार क्षेत्रमा सलह समुह-समुहमा देखिएको स्थानीयले बताएका छन्।

चियाबारी क्षेत्रमा किसानले लगाएका मकै तथा धानको ब्याड र जंगलको रुख विरुवामासमेत छपक्कै सलह भेटिएको बताइएको छ ।

जिल्लामा सलह देखिएसँगै किसान चिन्तित बनेका छन् ।