काठमाडौं– स्वास्थ्य तथा जनसंख्या मन्त्रालयले र्‍यापिड डाइग्नोस्टिक टेस्ट (आरडीटी) गर्दा कोरोना संक्रमणको संकेत (एन्टिबडी पोजेटिभ) २ जना नर्ससँग सम्पर्कमा रहेका व्यक्तिहरुको पनि कोरोना परीक्षणको तयारी गरेको छ ।

स्वास्थ्य मन्त्रालयका प्रमुख विशेषज्ञ डाक्टर रोशन पोखरेलले केन्द्रीय कारागारमा खटिएका नर्समा आरडीटी परीक्षणका क्रममा एन्टिबडी पोजेटिभ देखिएका कारण उनीहरुको सम्पर्कमा रहेका व्यक्तिहरुको पनि कोरोना परीक्षणको तयारी गरिएको जानकारी दिए ।

डा पोखरेलका अनुसार ती २ जना नर्सको सम्पर्कमा रहेका ५६ जनालाई कन्ट्रयाक ट्रेसिङमार्फत पहिचान गरी कोरोना परीक्षण गर्न लागेको हो ।

ती २ जना नर्ससँग सम्पर्कमा रहेका व्यक्ति छुटेको भए मन्त्रालयको टोल फ्री नम्बरमार्फत सम्पर्क गर्न पनि डा पोखरेलले आग्रह गरेका छन् ।

केही दिन अगाडी केन्द्रीय कारागारका २ जना नर्सको आरडीटीका क्रममा एन्टिबडी पोजेटिभ देखिएको थियो । तर, पीसीआर विधिबाट गरीएको परीक्षणका क्रममा भने उनीहरुको रिपोर्ट नेगेटिभ आएको थियो ।

स्वास्थ्य मन्त्रालयका प्रमुख विशेषज्ञ डाक्टर पोखरेलले कोरोना भाइरसका संक्रमितको उपचार तथा रोकथामका लागि खटिने चिकित्सक तथा स्वास्थ्यकर्मीले विशेष ध्यान दिएर काम गर्नुपर्ने पनि बताए ।

कोरोन संक्रमित बिरामीको उपचारमा आइसोलेसनमा खटिएपछि आफूलाई कोरोना लागेको शंका लागेमा कोरोना परीक्षण गराउन पनि उनले स्वास्थ्यकर्मीलाई आग्रह गरेका छन् ।

डा पोखरेलले फ्रन्टलाइनमा खटिएर कोरोनाका उपचारमा खटिएका चिकित्सकहरुलाई धन्यवाद पनि दिए । डा पोखरेलले हाल देशभरलाई पुग्ने स्वास्थ्य सामाग्री भएकाले चिन्ता नलिइ काम गर्न स्वास्थ्यकर्मीलाई आग्रह गरेका छन् ।