काठमाडौं– कोरोना भाइरस (कोभिड १९) संक्रमणको जोखिम कम गर्न सरकारले लकडाउनको आदेश जारी गरेको बेला मोटरसाइकलमा लागू औषध (गाँजा) तस्करी गर्ने ३ जना पक्राउ परेका छन् ।

प्रहरीले धनुषा र नवलपरासी (पूर्व) जिल्लाबाट गरी अवैध गाँजासहित ३ जनालाई पक्राउ गरेको हो ।

धनुषाको बिदेह नगरपालिका-६ बाट अवैध लागूऔषध गाँजा १ किलो सहित २ जनालाई शनिबार राति पक्राउ गरिएको धनुषा प्रहरीले जानकारी दिएको छ ।

पक्राउ पर्नेहरुमा सोही नगरपालिका-७ बस्ने ३१ वर्षीय प्रमोद दास र २६ वर्षीय दिप नारायण दास रहेका छन् ।

प्रहरी चौकी गिद्दाबाट खटिएको प्रहरीले हट्ठीपुरबाट बफैतर्फ आउँदै गरेको ज १० प २३१२ नम्बरको मोटरसाइकल जाँच गर्ने क्रममा उक्त लागूऔषध गाँजा सहित फेला पारी मोटरसाइकल चालक प्रमोद दास र मोटरसइकलमा सवार दिप नारायण दासलाई पक्राउ गरेको हो ।

यस्तै, नवलपरासी(पूर्व)को मध्यबिन्दु नगरपालिका-११ अरुणखोलास्थित सडकबाट अवैध लागूऔषध गाँजा करिब १ किलो ५ सय ग्रामसहित सोही नगरपालिका-१५ माथिल्लो भ्युरान बस्ने २८ वर्षीय तेज बहादुर नेपालीलाई आइतबार राति प्रहरीले पक्राउ गरेको छ ।

प्रहरी चौकी अरुणखोलाबाट खटिएको प्रहरीले लु ५९ प ९४५१ नम्बरको मोटरसाइकल जाँच गर्ने क्रममा उक्त लागूऔषध सहित फेला पारी मोटरसाइकल चालक तेजलाई पक्राउ गरेको हो ।

साथै मोटरसाइकलमा उनीसँगै सवार सोही ठाउँ बस्ने ३० वर्षीय सुरेश कुमाल फरार रहेकोले प्रहरीले खोजी गरिहरेको छ ।