काठमाडौं- प्रदेश पाँचका मुख्यमन्त्रीसमेत रहेका नेकपाका नेता शंकर पोखरेलले पार्टी एकता जोगाउन विश्वास र सहकार्यको वातावरण तयार गर्न अपिल गरेका छन् ।

प्रधानमन्त्री ओलीका निकटपात्र समेत रहेका मुख्यमन्त्री पोखरेल यतिबेला काठमाडौंमा छन् ।

सत्तारुढ दल नेकपाभित्र पछिल्ला केही दिन यता देखिएको संकट समाधानका लागि पोखरेल प्रधानमन्त्री केपी ओलीसँग छलफलमा रहेका छन् ।

नेता पोखरेलले आपसी कटाक्ष र टिप्पणी बन्द गर्न नेकपाका नेता कार्यकर्तालाई अपिल गरेका छन् । मिलेमा जितिने र झैझगडाले नसिने भएका कारण गम्भीर बन्न उनले आग्रह गरेका छन् ।

नेकपामा राजनीतिक संकट चुलिँदै जाँदा प्रधानमन्त्री ओलीले नेता पोखरेलमार्फत नेता माधव कुमार नेपालसहित अन्यसँग छलफल जारी रखेका थिए ।

मुख्यमन्त्री पोखरेलले नेता नेपालसँग निरन्तर छलफल गरिरहेका छन् । पार्टीमा देखिएको समस्या, समाधानका उपाय र प्रधानमन्त्रीसमेत रहेका पार्टी अध्यक्ष ओलीको धारणाबारे उनले छलफल गरिरहेका हुन्।