काठमाडौं- छातिमा असहज महशुस भएपछि प्रधानमन्त्री केपी शर्मा ओली अस्पताल भर्ना भएका छन् ।

उनलाई गएराति नै त्रिवि शिक्षण अस्पताल महाराजगञ्जमा भर्ना गरिएको हो ।

फागुन २१ गते दोस्रो पटक मिर्गौला प्रत्यारोपण गरेपछि केही दिन आरामपछि प्रधानमन्त्री निवासबाट दैनिक कार्यसञ्चाल गर्दै आएका ओलीलाई धेरै धपेडी भएको हुन सक्ने बताइएको छ ।

मिर्गौला प्रत्यारोपणपछि प्रधानमन्त्री ओलीले सार्क राष्ट्रध्यक्ष तथा सरकार प्रमुखको भिडियो कन्फरेन्सदेखि मन्त्रीपरिषद् बैठकमा समेत सहभागी हुँदै आएका थिए ।

मुटुको धड्कनमा समस्या देखिएकाले हिजो राति अस्पताल भर्ना गरिएको प्रधानमन्त्रीका प्रेस सल्लाहकार सूर्य थापाले जानकारी दिए।

निजी चिकित्सक दिव्यासिंह शाहको भनाई उद्धृत गर्दै थापाले भने, “प्रधानमन्त्रीको स्वास्थ्य अवस्था सामान्य भइसकेकाले आजै डिस्चार्ज गरिने तयारी छ”