काठमाडौं– स्वास्थ्य तथा जनसंख्या मन्त्रालय अन्तर्गतकाे इपिडिमियोलोजी तथा रोग नियन्त्रण महाशाखाले कोरोना भाइरसको संक्रमण एक जना नेपालीमा मात्र देखिएको बताएको छ ।

सोमबार दिउँसो थप एक जना महिलालाई पनि कोरोना भाइरसको संक्रमण देखिएको विभिन्न मिडियामा समाचार सार्वजनिक भए पनि मन्त्रालयले भने एक जनामा मात्र संक्रमणको पुष्टि भएको बताएको हो।

इपिडिमियोलोजी तथा रोग नियन्त्रण महाशाखाका निर्देशक डा विवेक कुमार लालले भने, ‘अहिले धेरै ठाउँबाट परीक्षणका लागि रिपोर्टहरू आइरहेको छ, म यतिमात्र भन्न सक्छु आजसम्म जतिपनि टेष्टहरू भएको छ त्यो कुनैपनि पोजेटिभ छैन ।’

टेकुस्थित शुक्रराज ट्रपिकल तथा सरुवा रोग अस्पतालमा उपचाररत ४८ वर्षीय एक महिलामा कोरोना भाइरस भेटिएको खबर अस्पताल स्रोतबाटै बाहिरिएको थियो ।

महाशाखाले जारी गरेको वज्ञप्तिमा ती महिलाका विषयमा कुनै पनि कुरा उल्लेख गरिएको छैन ।  कुनै पनि थप व्यक्तिमा कोरोना भाइरसको संक्रमण पुष्टि नभएको विवरण मात्र उल्लेख छ।

‘कोरोना भाइरस फैलिएको समयमा सबैले यसको संक्रमणा फैलन नदिन लाग्नु पर्ने अवस्थामा चिकित्सकलाई समेत रोगबारे नबोल्नु भनेर निर्देशन दिइएको छ’, महाशाखाकै एक स्वास्थ्यकर्मीले खबरहबसँग भने, ‘अस्पताल, इपिडिमियोलोजी र स्वास्थ्य मन्त्रालयका व्यक्तिहरूले सूचना समेत लुकाइरहेका छन्।’

उनले महाशाखाले सूचना लुकाउने प्रयास गरेको दाबी गरे । उनले भने, ‘सूचना नलुकाइएको हो भने जो व्यक्तिका विषयमा खबर बाहिर आएको हो उनको भाइरस नदेखिएको रिपोर्ट किन सार्वजनिक गरिएन ?’

अस्पताल स्रोतका अनुसार ती महिलाको मंगलबार पुनः प्रयोगशालामा नमुना परीक्षण गर्ने तयारी भएको छ।

जनस्वास्थ्य प्रयोगशालामा आज सोमबारदेखि नै कोरोना भाइरसको परीक्षण थालिएको हो ।

महाशाखाका निर्देशक लालले कुनैपनि व्यक्तिमा संक्रमण नभएको पुष्टि गरे पनि सोमबारदेखि राष्ट्रिय जनस्वास्थ्य प्रयोग शालामा शुरू गरिएको परिक्षण भने पूरा नभइसकेको जनस्वास्थ्य प्रयोगशाला स्रोतले बतायो ।

” आज परीक्षण कीट आएपछि दुइजनाको परीक्षणा शुरू गरिएको थियो, तर यहाँ गरेको परीक्षणको नतिजा आउन २४ घण्टा लाग्छ ।’, स्रोतले खबरहबसँग भन्यो ।

कोरोनाकै आशंका गरिएका एक अमेरिकी नागरिक र अर्का एक जना ३२ वर्षीय युवामा भने कोरोना भाइरस नदेखिएको अस्पताल जनाएको छ । उनीहरु दुवैजना चीनबाट फर्किएका थिए।

यसअघि एक जना नेपालीमा कोरोना भाइरसको संक्रमण भने पुष्टि भइसकेको छ। ती व्यक्ति उपचारपछि अस्पतालबाट डिस्चार्ज समेत भइसकेका छन्।

महाशाखाको बिज्ञप्ति