काठमाडौं – आफ्ना स्टार खेलाडी तथा कप्तान लियोनल मेस्सीबारे स्पेनिस महारथी बार्सिलोनाले मौनता तोडेको छ ।

मंगलबार राति मेस्सीले अध्यक्ष जोसेफ बर्तमोउलाई आफू क्लब छाड्ने योजनामा पुगेको भन्दै पत्र पठाएका थिए ।

तर, बुधबार बार्सिलोनाका सेटिङ डाइरेक्टरले उक्त विषयमा छलफल नभएको स्पष्ट पारेका छन् । उनले क्लबले ६ पटकको बालन डि अर खेलाडी क्लबमा रहुन् भन्ने चाहेको बताएका छन् ।

स्पोटिङ डाइरेक्टर रामोन प्लानेसले मेस्सीले आउँदो सिजन पनि बार्सिलोनाबाट खेल्ने विश्वास व्यक्त गर्दै भनेका छन्, ‘हामीले आशा गरेका छौं कि गएको सिजनभन्दा आगामी सिजनमा बलियो तरिकाले फर्किनेछौं । त्यसमा मेस्सी पनि हुनेछन् ।’

च्याम्पियन्स लिगको क्वाटरफाइनलमा बायर्न म्युनिखसँगको ८–२ गोल अन्तरको फराकिलो हारपछि मेस्सीले क्लब छाड्ने योजना सार्वजनिक भएको हो । क्लबले मेस्सीका लागि ७ सय मिलियनको रिलिज क्लज खोलेको थियो ।