काठमाडौं – लामो समयदेखि चर्चामा रहेको अमेरिकी सहयोग परियोजना मिलिनियम च्यालेञ्ज कर्पोरेशन (एमसीसी) का विषयमा अमेरिकाले चासो व्यक्त गरेको छ ।

आइतवार उपप्रधानमन्त्री तथा रक्षामन्त्री ईश्वर पोखरेलसँगको भेटका क्रममा अमेरिकी राजदूत र्‍याण्डी बेरीले एमसीसीबारे चासो व्यक्त गरेका हुन् ।

सत्तारुढ दल नेकपाका नेताहरुबीच एमसीसी अनुमोदन गर्ने या नगर्ने भन्ने विषयमा मत बाझिँदै आएको छ । यसैबीच बेरीले रक्षामन्त्री पोखरेललाई भेटेर एमसीसीबारे चासो राखेका हुन् ।

रक्षा मन्त्रालयका सहसचिव सन्तबहादुर सुनारका अनुसार पोखरेलसँगको भेटमा राजदूत बेरीले अन्य देशहरुबाट एमसीसी सहयोग माग भइरहेका बेला नेपालले किन ढिला गरेको हो भनेर चासो राखेका थिए ।

एमसीसी गत जेठ १६ गतेभित्र नै संसदबाट पारित गरिसक्नुपर्ने थियो । उक्त मितिभित्र पारित हुन नसकेपछि नेपालले गरेको आन्तरिक तयारीबारे राजदूत बेरीले जानकारी लिएको बताइएको छ ।

रक्षामन्त्री पोखरेलले एमसीसीबारे अझै छलफल चलिरहेकाले अनुमोदन गर्न ढिला भएको बताएका थिए ।

राजदूत बेरीले छिमेकी देश भारतमा कोरोना भाइरसको संक्रमण फैलिएका बेला नेपालमा लकडाउन खुलाइएकोबारे पनि चासो राखेका थिए ।

रक्षामन्त्री पोखरेलले अवस्था हेरेर स्थानीय प्रशासनले पनि लकडाउन गर्न सक्ने बताएका थिए ।