काठमाडौं– नेपाली कांग्रेसका नेता डा. शेखर कोइरालाले पूर्वसहमहामन्त्री गोविन्दराज जोशीसहित तीन जना नेतालाई पार्टीबाट निष्काशित गरेको विषयमा असन्तुष्टि जनाएका छन् ।

पार्टीले शनिबार जोशीसहित महासमिति सदस्य पुष्करनाथ ओझा र डडेलधुरा जिल्ला कार्यालय सचिव रामबहादुर विष्ट पार्टीबाट निष्काशित गरेको थियो ।

आइतबार सामाजिक सञ्जालमार्फत नेता कोइरालाले आधारहीन र मनगढन्ते तर्क अगाडी सारेर उनीहरुलाई पार्टीबाट निष्काशित गरिएको भन्दै आपत्ति जनाएका हुन् ।

‘आधारहीन र मनगढन्ते तर्क अगाडी सारेर गोविन्दराज जोशी, पुष्करनाथ ओझा र रामबहादुर बिष्टलाई कांग्रेस पार्टीबाट निष्कासन गरिनु दुर्भाग्य हो’, उनले भनेका छन् ।

त्यस्तै डा. कोइरालाले लोकतन्त्रका लागि लडेकाहरुको रगत पसिनाको अवमूल्यन गरेको आरोप लगाएका छन् । ‘उहाँहरूले पार्टी र लोकतन्त्रका पक्षमा बगाउनुभएको रगत पसिनाको अवमूल्यन गर्ने काम भएको छ’, उनले भनेका छन् ।

पछिल्लो समय पार्टीभित्र अन्य पार्टीका नेता कार्यकर्ता प्रवेश भइरुहेको अवस्थामा पार्टीबाट निष्काशित गर्नु उचित नभएको उनको तर्क छ । उनले पार्टीमा रहेका वरिष्ठ नेताहरुलाई निष्काशित गर्दा कार्यकर्तामा नकारात्मक सन्देश जाने बताएका छन् ।

‘एकातिर हामी अन्य पार्टीबाट नेपाली कांग्रेसमा प्रवेश गराउदैछौं अर्को तिर आफ्नो सम्पूर्ण जीवन पार्टीमा व्यतीत गरेका बरिष्ठ नेताहरूलाई पार्टीबाट निष्कासन गर्छौं । यसले पार्टी र कार्यकर्तामा के सन्देश जान्छ ?’, उनले भनेका छन् ।

शनिबार बसेको कांग्रेस केन्द्रीय अनुशासन समितिको बैठकले पार्टी अनुशासन उल्लंघन गरेको ठहर गर्दै जोशी र ओझालाई ५/५ वर्ष र विष्टलाई ३ वर्ष पार्टीबाट निष्कासन गर्ने निर्णय गरेको थियो । अन्तिम स्पष्टीकरण चित्तबुझ्दो नभएको र अनुशासन समितिलाई प्राप्त सबुद प्रमाण अडियो र भिडियो पार्टी विधानविपरीत रहेको भन्दै कारबाही गरिएको समितिद्वारा जारी विज्ञप्तिमा उल्लेख छ ।