बेइजिङ- चीनको गवाङ्सी जुआङस्थित युलिन सहरमा कुकुरको मासु उत्सव सुरु भएको छ ।
जंगली र घरपालुवा जनवारको मासु प्रतिबन्ध लगाउने चीन सरकारको अभियानका बाबजुद गवाङ्सी जुआङस्थित युलिन सहरमा कुकुरको मासु उत्सव सुरु भएको हो ।
१० दिनसम्म चल्ने यो उत्सवमा हजारौं मानिसहरु सहभागी हुने न्युयोर्क पोस्टले जनाएको छ । तर, अभियानकर्ताहरुले भने विगतका भन्दा यस वर्ष कम सहभागी हुने र सम्भवत: यो वर्ष अन्तिम उत्सव हुने बताएका छन् ।
“मलाई आशा छ किन जनावरका लागि मात्र नभएर मानिसको स्वास्थ्य र सुरक्षाका दृष्टिकोणले पनि यस्ता पर्वहरु अब हुनेछैनन् र युलिन परिवर्तन हुनेछ,” चीनी नीति विज्ञसमेत रहेका जनावर अधिकारकर्मी पिटर लिले भने ।
उनले यस्ता पर्वहरु आयोजना गर्दा र मानिसहरु भिडभाड जम्मा हुँदा जनस्वास्थ्यमा खतरा उत्पन्न हुने र कोरोना भाइरसको संक्रमण थप बढ्ने बताएका छन् ।
नोभेल कोरोना भाइरस चमेरोबाट आएर मानवमा सरेको भनिएकोमा चीनले जनवारबीचको सम्बन्धलाई फेरि पुनर्मूल्यांकन गर्न आवश्यक रहेको बताएको छ ।
चीन सरकारले वन्यजन्तुको व्यापार र घरपालुवाको सुरक्षात्मक उपायसम्बन्धी नयाँ नियम ल्याउने तयारी समेत गरिरहेको बताइएको छ । गत फेब्रुअरीमा चीन सरकारले वन्यजन्तुको व्यापारमा रोक लगाएको थियो ।
गत अप्रिलमा सेन्जेनमा कुकुरको मासुसमेत बिक्री गर्न प्रतिबन्द लगाउने पहिलो सहर बनेको थियो ।
कृषि मन्त्रालयलेसमेत कुकुरलाई घरमा पाल्न सकिने भए पनि मासुजन्य पशुको रुपमा राख्न नहुने बताएको थियो ।
नोभेल कोरोना भाइरसको संक्रमण बढेपछि कुकुरलगायतका जनावरको मासुमा प्रतिबन्ध लगाउनुपर्ने भन्दै चर्को विरोध समेत भएको थियो ।
प्रतिक्रिया