काठमाडौं– नेपाल सरकारका पूर्व सचिव भीम उपाध्यायविरुद्ध विद्युतीय कारोबार (साइबर क्राइम)अन्तर्गत मुद्दा दर्ता भएको छ ।

प्रहरीको केन्द्रीय साइबर ब्यूरोको अनुसन्धानपछि जिल्ला सरकारी वकिल कार्यालय काठमाडौंले पूर्व सचिव उपाध्यायविरुद्ध आइतबार काठमाडौं जिल्ला अदालतमा साइबर अपराधको मुद्दा दर्ता गरेको हो ।

पूर्वसचिव उपाध्यायविरुद्ध विद्युतीय कारोबार ऐन, २०६३ को दफा ४७ अन्तर्गतको कसुर गरेको अभियोग लगाइएको छ । दफा ४७ मा विद्युतीय स्वरुपमा गैरकानूनी कुरा प्रकाशन गर्न नपाइने व्यवस्था गरिएको छ ।

ऐनको दफा ४७ को उदफा (१) मा ‘कम्प्युटर, इन्टरनेट लगायतका विद्युतीय सञ्चार माध्यमहरुमा प्रचलित कानूनले प्रकाशन तथा प्रर्दशन गर्न नहुने भनी रोक लगाएका सामग्रीहरु वा सार्वजनिक नैतिकता, शिष्टाचार विरुद्धका सामग्री वा कसैप्रति घृणा वा द्वेष फैलाउने वा विभिन्न जात जाति र सम्प्रदायबीचको सुमधुर सम्बन्धलाई खलल पार्ने किसिमका सामग्रीहरु प्रकाशन वा प्रदर्शन गर्न’ नपाइने उल्लेख छ ।

यस्तो कार्य गर्ने व्यक्तिलाई १ लाख रुपैयाँसम्म जरिवाना वा ५ वर्षसम्म कैद वा दुवै जसाय हुने व्यवस्था गरिएको छ ।

स्वास्थ्य समग्री खरिद लगायतका विषयमा सरकार तथा स्वास्थ्य तथा जनसंख्या मन्त्रालयका सचिवमाथि विभिन्न आरोप लगाएको भन्दै उपाध्यायलाई पक्राउ गरिएको थियो ।

प्रहरीको केन्द्रीय अपराध ब्यूरोले वैशाख १० गते साँझ पक्राउ गरी उपाध्यायमाथि अनुसन्धान शुरु गरेको थियो । काठमाडौं जिल्ला अदालतले उपाध्यायमाथि अनुसन्धानका लागि ३ दिनको म्याद दिएको थियो ।