काठमाडौं– नेपालस्थित कूटनीतिक समुदायले तिब्बती शरणार्थीसँग यस वर्षको ल्होसार मनाएका छन् । यो वर्ष तिब्बतीहरुले मुसा वर्ष २१४७ मनाएका छन् ।

ल्होसार मनाउन बौद्धमा आयोजित एक कार्यक्रममा काठमाडौंस्थित युरोपेली युनियनकी राजदूत एवं प्रतिनिधि मण्डलकी प्रमुख भेरोनिका कोडी, नेपालका लागि अष्ट्रेलियन राजदूत पिडर बड, स्विस राजदूत एलिसाबेथ भोन क्यापेलरको सहभागिता थियो ।

त्यस्तै, कार्यक्रममा अमेरिकी डेपुटी चिफ अफ मिसन म्यानुअल पी मिकलर जुनियर, फ्रेन्च डेपुटी चिफ अफ मिसन आर्नु स्याम्पी तथा जर्मन दूतावास र संयुक्त राष्ट्रसंघीय मानवअधिकार आयोगका प्रतिनिधिहरु पनि सहभागि थिए ।

ल्होसार समारोह धार्मिक प्रार्थानाबाट शुरु भएको थियो । त्यसपछि पाहुनालाई देसिल, खाप्से र तिब्बती चिया दिइएको थियो ।

तिब्बती शरणार्थी कल्याण कार्यालयका प्रतिनिधि सुल्त्रिम ग्यात्सोले उपस्थित पाहुनाहरुलाई धन्यवाद दिएका थिए ।

उक्त कार्यक्रममा दुई तिब्बती एक नेपाली र एक भुटानी गीतसहित साँस्कृतिक प्रस्तुती समेत दिइएको थियो ।