काठमाडौं– एक जना पूर्व सैनिक काठमाडौंको काभ्रेस्थलीमा लुटिएका छन् । उनको साथमा रहेको ५० लाख लुटपाट भएको हो । नेपाली सेनाका अवकाश प्राप्त सुबेदार बच्चुराम गुरुङ लुटपाटमा परेका हुन् ।

प्रहरीका अनुसार उनी ‘बल्ने ढुंगा’ किन्नका लागि काभ्रेस्थलीको जंगलमा पुगेका थिए । गत शुक्रवार उनी उक्त ढुंगा किन्नका लागि गएका थिए ।

साथीहरुले बल्ने ढुंगा किन्दा पछि एक करोड भन्दा महंगोमा बेच्न पाइन्छ भन्ने सुनाएपछि उनी पैसा बोकेर बल्ने ढुंगा बेच्ने मानिसलाई भेट्न त्यहाँ गएका थिए । तर त्यहाँ भेला भएका लुटेराको समूहले उनीसँग भएको ५० लाख लुटपाट गरेका थिए ।

लुटपाटमा संलग्न ६ जनालाई पक्राउ गरिएको महानगरीय अपराध महाशाखाका प्रमुख (एसएसपी) सहकुलबहादुर थापाले बताए ।

गुरुङले भने आफूलाई जग्गाको बैना गर्न बोलाएर लुटपाट गरिएको प्रहरीलाई बताएका छन् । लुटपाटमा संलग्न अन्य पनि जग्गा प्लटिङमा संलग्न रहेको प्रहरी अनुसन्धानबाट खुलेको छ ।

गुरुङसँग साथमै गएका साथी पनि लुटपाटमा संलग्न भएको पाइएको प्रहरीले जनाएको छ ।

पक्राउ परेकाहरुबाट प्रहरीले १९ लाख रुपैयाँ नगद र दुईओटा मोटरसाईकल बरामद गरेको छ । घटनाबारे थप अनुसन्धान भइरहेको प्रहरीले जनाएको छ ।