काठमाडौँ- संस्कृति, पर्यटन तथा नागरिक उड्डयन मन्त्री योगेश भट्टराईले आफूले प्राप्त गरेको कोरोना बीमा वापतको रकमले तीन सय जना विपन्न व्यक्तिको बीमा गरिदिएका छन् ।

कोरोना बीमाबापत प्राप्त गरेको १ लाख रुपैयाँको उनले आफ्नो निर्वाचन क्षेत्र ताप्लेजुङका ३ सय जना विपन्न व्यक्तिहरूको  कोरोना बीमा गरिदिएका हुन् ।

मन्त्री भट्टराईका स्वकीय सचिव प्रेम गुरागाईका अनुसार पर्यटन मन्त्री कोरोना भाइरसको संक्रमणबाट मुक्त भएसँगै उनले बीमावापतको एक लाख रुपैयाँ प्राप्त गरेका थिए ।

उक्त रकमबाट मन्त्री भट्टराईले आफ्नो निर्वाचन क्षेत्र ताप्लेजुङका ३ सय न्यून आए भएका, विपन्न, विद्यार्थी, असहाय तथा मजदुरको कोरोना बीमा गर्न खर्च गरेका हुन् ।

मन्त्री भट्टराईले आफ्नो तलवभत्ताबाट ताप्लेजुङ स्थायी ठेगाना भएका कुल १ हजार २७६ जनाको कोरोना बीमा गराइदिएका छन् । योसहित उनले कुल १५७६ जना नागरिकको कोरोना बीमा आफ्नो खर्चबाट गराइदिएको उनको सचिवालयले जानकारी दिएको छ ।