काठमाडौं – अमेरिकामा एकै दिन ४० हजारभन्दा बढीमा कोरोना भाइरसको संक्रमण पुष्टि भएको छ ।

तथ्याङ्क अद्यावधिक गरिरहेको साइट वर्ल्डोमिटर्सका अनुसार अमेरिकामा शनिबारदेखि सोमबारसम्म संक्रमितको संख्यामा केही कमी देखिए पनि मंगलबार फेरि संक्रमित बढेका छन् ।

शनिबार ४८ हजार ५१७ जनामा संक्रमण देखिएकोमा आइतबार ४३ हजार ६१२ जना र सोमबार ३२ हजार ७१८ जनामा संक्रमण देखिएकोमा मंगलबार ४० हजार ५६५ जनामा संक्रमण पुष्टि भएको छ । यो अघिल्लो दिनको तुलनामा झण्डै ८ हजारले बढी हो ।

अमेरिकामा अहिलेसम्म कोरोना संक्रमित संख्या ५९ लाख १४ हजार ७११ पुगेको छ। संक्रमितमध्ये अहिलेसम्म ३२ लाख १६ हजार ६५ जना संक्रमणमुक्त भएका छन् ।

उपचार गराइरहेका २५ लाख १७ हजार ५४९ जनामध्ये १६ हजार ६१८ जनाको अवस्था गम्भीर रहेको वर्ल्डोमिटर्सले जनाएको छ ।

मंगलबार बिहान यो समाचार तयार पार्दासम्म अमेरिकामा कोरोना संक्रमणकै कारण ज्यान गुमाउनेको संख्या १ लाख ८१ हजार ९७ पुगेको छ । पछिल्लो २४ घण्टामा थप ४९३ जनाको मृत्यु भएसँगै मृतक संख्या १ लाख ८१ हजार नाघेको हो ।