काठमाडौं – जर्मन बुण्डेसलिगा फुटबलमा आरबी लाइपजिगले शानदार जीत हासिल गरेको छ ।

आइतबार भएको खेलमा लाइपजिगले माइन्जलाई ५ -० गोल अन्तरले पराजित गरेको हो ।

लाइपजिगको जीतमा टिमो वर्नरले ह्याट्रिक गरे । यस्तै युसुफ पुल्सेन र मार्सेल सबिट्जरले एक एक गोल गरे ।

माइन्जको मैदानमा ११ औं मिनेटमा वर्नरले गोल गर्दै खाता खोलेका थिए । २३ औं मिनेटमा युसुफले लाइपजिगको अग्रता दोब्बर बनाए । ३६ औं मिनेटमा मार्सेलले गोल गर्दा लाइपजिग पहिलो हाफमा ३-० ले अघि रह्यो ।

दोस्रो हाफमा वर्नरले ह्याट्रिक पूरा गरे । खेलको ४८ औं मिनेटमा वर्नरले व्यक्तिगत दोस्रो गोल गर्दा ७५ औं मिनेटमा ह्याट्रिक पूरा गर्दै टोलीलाई ५ -० को जीत दिलाए ।

जीतसँगै लाइपजिगले २७ खेलबाट ५४ अंक जोडेको छ । लाइपजिग लिगको तेस्रो स्थानमा रहेको छ ।