काठमाडौँ– वैदेशिक रोजगारीका लागि हाल साउदी अरेबियामा रहेका बिष्णु बुढाथोकी नामका व्यक्तिले प्रधानमन्त्रीका प्रेस सल्लाहकार सूर्य थापाले फेसबुक च्याटमा ज्यान मार्ने धम्की दिएको आरोप लगाएपछि थापा प्रहरीको साइबर ब्युरोमा पुगेका छन् ।

सिन्धुलीको मरिन गाँउपालिका–४ का स्थायी बासिन्दा बुढाथोकीले थापाले आफूलाई फेसबुक च्याटमा धम्की दिएको भन्दै थापाको नाम र तस्बीर र रहेको फेसबुक आइडीबाट आएको धम्कीपूर्ण म्यासेजको स्क्रिनसट पोस्ट गरेका थिए ।

थापाले ज्यान मार्ने धम्कीको म्यासेज भएको आइडी आफ्नो नभएको र आफूमाथि षड्यन्त्र भएको भन्दै स्टास लेखेका छन् । उनले त्यस प्रकारको च्याट कसैसँग नभएको, त्यसो गर्न आफूसँग फुर्सद नरहेको र कारबाहीका लागि साइबर ब्युरोमा उजरी गरिसकेको उल्लेख गरेका छन् ।

थापाले लेखेका छन्– मेरो फेसबुकको प्रोफाइल पिक्चर दुरुपयोग गरी नक्कली फेसबुक खोलेर षडयन्त्रपूर्ण च्याट गरेको स्क्रिनसट शेयर गरी बदनाम गर्ने अभियान चलाइरहेको प्रति मेरो गम्भीर ध्यानाकर्षण भएको छ । यस्तो च्याट मेरो कसैसँग भएको छैन । यसो गर्न मलाई फुर्सद पनि छैन । र, यस षड्यन्त्रको घोर भत्र्सना गर्दै भ्रममा नपर्न सबैमा हार्दिक अनुरोध गर्दछु । साथै, मैले साइबर ब्यूरोसमक्ष यसको आवश्यक अनुसन्धान गरी अविलम्ब कारबाही होस् भनी उजुरी गरिसकेको समेत जानकारी गराउन चाहन्छु ।

प्रधानमन्त्रीका प्रेस सल्लाहकार थापाले खबरहबसँगको जिज्ञासामा ज्यान मार्ने धम्की दिएको आरोप लगाउने व्यक्तिलाई आफूले नचिनेको र फेस बुकमा साथी समेत नरहेको बताए ।

आफूले तत्कालै प्रहरीको साइबर ब्युरोमा उजुरी गरेको पनि उनले बताए । प्रहरीको अनुसन्धानबारे भने आफूलाई जानकारी आइनसकेको उनले बताए ।