काठमाडौं-लन्डनमा कोरोनाभाइरसबाट संक्रमित भएकी भगवती रानाभाट निको भएर घर फर्किएकी छिन् ।

कोरोनाको परीक्षणमा पोजिटिभ देखिएपछि भगवती अस्पताल भर्ना भएकी थिइन् । सामाजिक अभियन्ता समेत रही उनी शुक्रबारदेखि ह्यारोस्थित नर्थविक पार्क अस्पतालको क्रिटिकल केयर युनिटमा उपचार गराइरहेकी थिइन ।

गत ८ तारिख दिउँसो उनी लन्डनको भेन्यू फाइभमा आयोजित अन्तर्राष्ट्रिय नारी दिवस कार्यक्रममा सहभागी भएकी थिइन्। त्यसको भोलिपल्ट ९ तारिख मध्यरात १२ बजेदेखि उच्च ज्वरो तथा रुघाखोकी लागेको थियो ।

घरमै औषधी गरेर पनि निको नभएपछि उनलाई शुक्रबार घरैमा एम्बुलेन्स आएर अस्पताल लगेको थियो ।

अस्पतालमा भर्ना भएको १३ दिनसम्म पनि निको नभएको भन्दै भगवतीले सामाजिक सञ्जाल फेसबुकमा लामो स्टाटस र तस्बिर राख्दै सबैलाई कोरोनाबाट सावधानी रहन सचेतसमेत गराएकी थिइन् ।

उनलाई संक्रमण भएपछि श्रीमान् मीन रानाभाटसहित एक छोरा र छोरी अहिले घरमा सेल्फ आइसोलेसनमा छन्। अहिले भगवती कोरोना संक्रमणलाई जितेर अस्पतालबाट डिस्चार्ज भएकी छन् ।