काठमाडौं – कोरोना भाइरस संक्रमण फैलिन सक्ने भन्दै सरकारले नेपालमा ‘लक डाउन’ गरेपछि कलाकारहरु सेल्फ क्वारेन्टाइनमा छन् । सेलिब्रेटीहरु धमाधम सेल्फ क्वारेन्टाइनमा बसेका छन् ।

नायिका नम्रता श्रेष्ठ ५ दिनदेखि सेल्फ क्वारेन्टाइनमा बसेकी छिन् । उनले महामारीका रुपमा फैलिएको कोरोना भाइरसबाट बच्न घरमै बस्नु सबैभन्दा उत्तम भएको बताएकी छिन् ।

‘मैले पनि ५ दिनदेखि घरमै बसेर आफ्नो ख्याल गरिरहेको छु, यो भाइरस जसलाई पनि हुनसक्छ, जसमा पनि हुनसक्छ,’ नम्रता भन्छिन्, ‘हामीबाट अरुमा सर्न सक्छ, अरुबाट हामीमा सर्छ, त्यसैले सबैले ख्याल गरौं ।’

नम्रताले सबैलाई जिम्मेवार बन्न र घरभित्रै रहन हार्दिक अपील गरेकी छिन् । उनले कोरोना भाइरसको संक्रमणबाट बच्न सबैलाई घरमा बस्न र आफ्नो ख्याल राख्न अनुरोध गरेकी छिन् ।