दिल्ली– विवादास्पद नागरिकता विधेयकको विरोधमा भारतको राजधानी दिल्लीमा भएको हिंसामा ७ जनाको ज्यान गएको छ । भारतीय सञ्चारमाध्यमका अनुसार विधेयकको समर्थन र विरोधमा भेला भएका मानिसहरुबीच हिंसा मच्चिएको हो । हिंसाका क्रममा अरु १५० जनाभन्दा धेरै घाइते भएका छन् ।

मारिनेमा भारतीय प्रहरीका एकजना हेड कन्स्टेबल (हवल्दार) समेत छन् । विवादास्पद विधेयकको विरोधमा दिल्लीको उत्तरपूर्वी जिल्लामा हिंसा मच्चिएको जनाइएको छ । मारिने एवं घाइते हुनेमध्ये केहीको शरिरमा देसी कट्टा भनिने घरेलु बन्दुकको घाउ रहेको प्रहरीले जनाएको छ । त्यसबाहेक प्रहरीले दिल्लीका विभिन्न ८ स्थानमा आगजनीको घटना भएको जनाएको छ ।

विधेयकको समर्थन र विरोधमा भेला भएका मानिसहरुबीच हिंसा भएपछि त्यसलाई नियन्त्रणमा लिन प्रहरीले अश्रुग्याँस र पानीको फोहोरा प्रहार गरेको थियो । जवाफमा प्रदर्शनकारीले प्रहरीमाथि ढुङ्गामुढा प्रहार गरेका थिए ।

हिंसाग्रस्त इलाकामा विद्यालय तथा रेलसेवा बन्द गरिएको भारतीय अधिकारीले जनाएका छन् ।

हालै दिल्लीको मुख्यमन्त्रीमा पुन निर्वाचित भएका अरविन्द केजरीवालले प्रदर्शनकारीलाई संयमता अपनाउन आह्वान गरेका छन् ।