अमेरिका – न्यूओर्कको एक अदालतले हलिउड फिल्म निर्माता हार्भी वाइन्सटिनलाई बलात्कार र कुटपिट गरेको आरोपमा दोषी ठहर गरेको छ ।

मीटू मुभमेन्टका बेला उनीमाथि महिला हिंसा गरेको आरोप लागेको थियो । ६७ वर्षीय वाइन्सटिनलाई अदालतले थर्ड डिग्री बलात्कार र फर्स्ट डिग्री आपराधिक यौन कार्यमा दोषी ठहर गरेको बीबीसीले जनाएको छ ।

हार्भीलाई २५ वर्षसम्मको जेल सजाय हुन सक्ने जनाइएको छ । उनीविरुद्ध ८० जना महिलाले यौन दुर्व्यवहार गरेको आरोप लगाएका थिए । यस्तै २ जना महिलाले आफूमाथि कुटपिट गरेको आरोप लगाएका छन् ।

हलिउडका यी चर्चित निर्माताले गुड विल हन्टिङ्, द किङ्ग्स स्पीच र शेक्सपियर इन लभ लगायतका फिल्म निर्माण गरेका थिए । यता वाइन्सटिनले भने यी सबै आरोपको खण्डन गर्दै आएका छन् ।

अदालतले जेल चलान गर्न आदेश दिएपछि यो मुद्दालाई मीटू मुभमेन्ट गर्ने महिलाहरुको जीतका रुपमा हेरिएको छ ।

हार्भीमाथि अभिनेत्री बन्न चाहने एक कलाकारलाई बलात्कार गरेको र सन् २००६ मा तत्कालीन उत्पादन सहायकलाई कुटेको आरोप समेत लागेको थियो । यही मुद्दामा अदालतले उनलाई दोषी ठहर गरेको हो ।