काठमाडौँ– बार्सिलोनाले आफ्ना स्टाइकर लुइस स्वारेजलाई ला लिगाकै अर्को क्लब एट्लेटिको मड्रिडमा पठाएको छ ।

एटलेटिकोले स्वारेजलाई फ्रि ट्रान्सफरमार्फत् लिएको बताएको छ । त्यसमा पनि विभिन्न प्रक्रिया गरी ६ मिलियन युरो खर्च भएको बताएको छ ।

स्वारेज बार्सिलोनामा आफ्ना् सम्झौताको अन्तिम वर्ष अर्को क्लब जान सहमत भएका हुन् । यसअघि उनी इटालीयन क्लब युभेन्ट्स जाने हल्ला चलेको थियो ।
उनले स्पेनमै रहने बताएपछि एट्लेटिको गएका हुन् ।

स्वारेजले एट्लेटिकोबाट करबाहेक वार्षिक ९ मिलियन युरो पारिश्रमिक पाउने सम्झौता गरेका छन् ।

६ वर्ष लामो समय बार्सिलोनामा बिताएका उनले २०३ खेलमा १९८ गोल गरेका थिए । प्रिमियर लिग क्लब लिभरपुलबाट बार्सिलोना पुगेपछि स्वारेजले ४ पटक ला लिगाको उपाधि, एक पटक च्याम्पियन्स लिग उपाधि, ४ पटक कोपा डेल रे उपाधि, दुई पटक सुपर कोपा डे स्पाना उपाधि, एक क्लब विश्वकप उपाधिसहित मार्का पत्रिकाले दिने पीचीची ट्रफी जितेका थिए ।