नवलपरासी- संघीय संरचनाबाट टुक्रिएको नवलपरासी जिल्लाको पूर्व र पश्चिमको पहिचान झल्किने गरी तयार गरिएको म्युजिक भिडियोमा पूर्व प्रधानान्यायाधीस गोपाल पराजुलीदेखि उद्योगपति गिर्वाण चौधरीसमेतले अभिनय गरेका छन् ।

नवलपरासीका २६ जना गायक गायिकाको श्वरमा रहेको ‘हाम्रो नवलपरासी’ गीतमा धार्मिक पर्यटकीय स्थलहरुको चर्चा गरिएको छ । गीतमा नवलपरासी घर भएका पुराना गायक तेजबहादुर केसी, कृष्णसुधा ढुंगाना, प्रचण्डलाल बुढादेखि पछिल्लो पुस्ताका चर्चित गायक गायिकाहरु हेमन्त शर्मा, इन्दीरा जोशी, सिन्धु जलेसा, रमेशराज भट्टराई लगायतले श्वर दिएका छन् ।

बुधबार मात्रै सार्वजनिक गरिएको यो म्यूजिक भिडियोमा अभिनेता राजेश हमाल, टीका पहाडीका साथै जिल्लाका चिरपरिचित हस्तीहरुले अभिनय गरेका छन् ।

म्यूजिक भिडियोमा अधिवक्ता सपना प्रधान मल्ल, पूर्व प्रहरी महानिरीक्षक ध्रुवबहादुर प्रधान, राष्ट्रिय खेलाडी विमल घर्तीमगर, चलचित्र निर्देशक आकाश अधिकारीले अभिनय गरेका छन् ।

राजेश कुमारको शब्द संगीतमा तयार पारिएको म्यूजिक भिडियोमा जिल्लाभित्रका व्यक्तित्वहरूका साथै त्यहाँका पर्यटकीय, धार्मिकस्थलहरुलाई म्यूजिक भिडियोमा दृश्यांकन गरिएको छ । साथै स्थानीय धर्म, कला र संस्कृतिलाई समेत गीतका माध्यमबाट देखाउन खोजिएको छ । पर्यटन प्रवद्र्धन गर्ने उद्देश्यले गीत तयार गरिएको गीत तथा संगीतकार श्रेष्ठले बताए ।