कावासोती- नवलपरासी (बर्दघाट सुस्तापूर्व), नवलपुरमा थप ४ जनामा कोरोना भाइरस संक्रमण पुष्टि भएको छ । तीमध्ये ३ जना होम क्वारेन्टिनमा थिए ।

मध्यबिन्दु नगरपालिकाका स्वास्थ्य शाखा प्रमुख माधवप्रसाद पोखरेलले दिएको जानकारीअनुसार मध्यबिन्दु नगरपालिका वडा नम्बर ३, ९ र १० मा साउदी अरब र भारतबाट आई होम क्वारेन्टिनमा बसेका पुरुषहरूमा कोरोना भाइरस संक्रमण देखिएको हो ।

वडा नम्बर ९ का ५० वर्षे एक पुरुष साउन १ गते भारतको जम्मुकस्मिरबाट सुनौली नाकासम्म आई त्यहाँबाट मोटरसाइकलमा घर पुगेका थिए । उनी होम क्वारेन्टिनमा थिए ।

वडा नम्बर १० का दुई पुरुषमध्ये २४ वर्षका एक जना साउन १ गते साउदी अरबबाट काठमाडौं आई त्यहाँबाट अरुणखोलासम्म बसमा आएका थिए । उनी अटोरिक्सा चढेर घर पुगी होम क्वारेन्टिनमा बसेका थिए ।

यस्तै, २२ वर्षका अर्का एक पुरुष साउन २ गते साउदी अरबबाट काठमाडौं आई बसबाट अरुणखोलासम्म आएका थिए । उनी पनि अटोरिक्सामा घर पुगेर होम क्वारेन्टिनमा थिए ।

वडा नम्बर ३ का २५ वर्षे एक पुरुष यही साउन २ गते भारतको दिल्लीबाट सुनौली नाकासम्म आई त्यहाँबाट भ्यानमा चढेर आएका थिए । उनी स्थानीय जनता मावि क्वारेन्टिनमा थिए ।

संक्रमित चारै जनाको अवस्था सामान्य रहेको र उनीहरूलाई रजहरस्थित सामुदायिक प्राकृतिक चिकित्सालयको आइसोलेसनमा पठाइएको जनाइएको छ । यससँगै मध्यबिन्दु नगरपालिकामा ६ जना महिला र ४८ जना पुरुष गरी ५४ जना कोरोना संक्रमित भएका छन् ।