मोरङ- कोरोनाभाइरसको संक्रमण पुष्टि भएका उदयपुरका मुस्लिमहरुलाई कोशी अस्पतालमै कुरान पढ्ने व्यवस्था मिलाइएको छ ।

शनिबारबाट शुरु हुने मुस्लिम समुदायको पवित्र पर्व रमजानलाई मध्यनजर गर्दै कुरान पढ्ने व्यवस्था मिलाइएको हो ।

शनिबार विहान ३ बजेअघि नै सेहरी हुनाले आजै सबै व्‍यवस्था मिलाएको विराटनगर रानी मरकज समितिका सचिव मोहम्मद इर्सादले बताए ।

कोशी अस्पतालमा उपचाररत उनीहरु चिकित्सकहरुसँग छलफल गरेर खानेकुराको पूर्व तयारी गरिएको सचिव इर्शादले जानकारी दिए।

हाल केन्द्रमा उपचारका क्रममा रहेका १६ जना नेपाली र १२ जना भारतीय मुश्लिम नागरिक रहेका छन्।उनीहरुलाई उदयपुरको भुल्के क्षेत्रबाट उपचारका लागि अस्पतालमा भर्ना गरिएको हो।

यसक्रममा शनिबार विहानका लागि ब्रेड, च्यूरा र दुधको व्‍यवस्था गरिएको छ। सचिव इर्शाद भन्छन्, ‘पहिलो विहानीका लागि हामीले तीन खानाको व्‍यवस्था गर्न आग्रह गरेकाछौ र सोही खानेकुरा अस्पतालमा रहनुभएकाले पाउनु हुनेछ।त्यसपछि उहाँहरुलाई रोजा खोल्न इफ्तारका लागि बेलुका साढे ६ बजे अरु खानेकुराको व्‍यवस्था गरिनेछ।’

पवित्र रमजानका समय सूर्य उदाएसँगै नअस्ताउञ्‍जेल खानपान बर्जित छ। यसक्रममा थुक समेत निल्न नमिल्ने गरी व्रत बसिने युवा अभियान्ता चाँदबाबु इराकीले बताए । हाल केन्द्रमा २६ जना पुरुष र दुईजना महिला उपचारका लागि भर्ना गरिएका छन्।