काठमाडौं– गृह मन्त्रालयले महानगरीय प्रहरी परिसर काठमाडौं र महानगरीय अपराध महाशाखामा नयाँ प्रमुख सरुवा गरेको छ ।

गृहमन्त्री रामबहादुर थापा (बादल)को निर्णयानुसार महानगरीय प्रहरी परिसर काठमाडौंको प्रमुख प्रहरी वरिष्ठ उपरीक्षक (एसएसपी) श्यामलाल ज्ञवालीको सरुवा भएको हो । यस्तै, अपराध महाशाखाको प्रमुख प्रहरी वरिष्ठ उपरीक्षक दीपक थापाको सरुवा भएको हो ।

काठमाडौं परिसरको प्रमुखमा सरुवा भएका एसएसपी ज्ञवाली प्रहरी महानिरीक्षक (आईजी) ठाकुर प्रसाद ज्ञवालीका सहोदर भाइ हुन् । उनी यसअघि महानगरीय प्रहरी आयुक्तको कार्यालय रानीपोखरीमा कार्यरत थिए ।

यस्तै, अपराध महाशाखाको प्रमुखमा सरुवा भएका एसएसपी थापा यसअघि प्रहरी प्रधान कार्यालयको आर्थिक प्रशासन महाशाखामा कार्यरत थिए ।

यसअघि काठमाडौं परिसरका प्रमुख उत्तमराज सुवेदी र अपराध महाशाखाका प्रमुख सहकुल थापा एसएसपीबाट डीआईजीमा बढुवा भएपछि दुवै निकाय नेतृत्व विहीन थिए ।