काठमाडौँ – सोमबार जारी भएका दुवै अध्यादेश फिर्ता लिने निर्णय गरेलगत्तै प्रधानमन्त्री केपी शर्मा ओलीले प्रमुख प्रतिपक्षी नेपाली कांग्रेसका सभापति शेरबहादुर देउवासँग भेट गरेका छन् ।

शुक्रवार अपराह्न प्रधानमन्त्री ओली र सभापति देउवाबीच केहीबेर एक्लाएक्लै वार्ता भएको थियो । केही बेरपछि भने नेकपाका अर्का अध्यक्ष प्रचण्ड पनि छलफलमा सहभागी भएका छन् ।

प्रधानमन्त्रीका प्रेस सल्लाहकार सूर्य थापाका अनुसार तीन नेताबीच पछिल्लो परिस्थिति र परस्पर समझदारीमा जोड दिँदै छलफल चलिरहेको छ ।

सरकारले अध्यादेश जारीगरेसँगै कांग्रेसले तत्काल फिर्ता लिन दवाव दिएको थियो । उक्त अध्यादेश आजै सरकारले फिर्ता लिने निर्णय गरेको थियो र राष्ट्रपति विद्यादेवि भण्डारीले पनि दुबै अध्यादेशलाई खारेज गरिसकेकी छिन् ।