काठमाडौं– कोरोना संक्रमण देखिएका भोजपुरका २६ वर्षीय पुरुषलाई विराटनगरको कोशी अस्पतालको आइसोलेनमा उपचार गरिने भएको छ ।

स्वास्थ्य मन्त्रालयका प्रवक्ता डा विकास देवकोटाका अनुसार उनी हाल हतुवागडीमा चिकित्सकको निगरानीमा रहेको र उनलाई विराटनगर ल्याउन लागिएको हो ।

गत फागुन ३० गते साउदीबाट हिमालयन एयरको विमानमा उनी नेपाल आएको डा देवकोटाले जानकारी दिए । नेपाल आएपछि उनी काठमाडौंबाट उदयपुर गए । उदयपुरमा केही दिन बसेर भोजपुर गएका थिए ।

प्रवक्ता देवकोटाका अनुसार उदयपुरमा बस्दा उनीसँग सम्पर्कमा रहेका अन्य व्यक्तिहरुको पनि थ्रोड स्वाब संकलन गरी परीक्षण गरिएको छ ।

ति युवाको वीपी कोइराला स्वास्थ्य विज्ञान प्रतिष्ठानको प्रयोगशालामा कोरोना परीक्षण गर्दा पोजेटिभ देखिएको थियो । उनीसँगै नेपालमा कोरोना संक्रमितको संख्या ४८ पुगेको छ भने १० जना निको भएर घर फर्किएका छन् ।

स्वास्थ्य मन्त्रालयका प्रवक्ता विकास देवकोटाका अनुसार हाल देशभरका विभिन्न अस्पतालमा ३८ जना कोरोना संक्रमितहरु आइसोलेनमा उपचारत छन् ।

बाग्लुङको धौलागिरी अस्पतालमा एकजना, धनगडीको सेती प्रादेशिक अस्पतालमाा एकजना, वीरगञ्जमा ५ जना, भरतपुरमा २ जना र बिराटनगरको कोशी अस्पतालमा २८ जना कोराना संक्रमित उपचारत रहेको र सबै संक्रमितको स्वास्थ्य अवस्था सामान्य रहेको उनले जानकारी दिए ।

हालसम्म पीसीआर विधिबाट ९ हजार ४ सय ७ जनाको परीक्षण गरिएको छ भने र्‍यापिट डाइग्रोष्टि टेष्ट किट (आरडीटी) बाट ३८ हजार ८९ जनाको कोरोना परीक्षण गरिएको छ । पीसीआर र आरडीटी दुवै विधिबाट हालसम्म ४७ हजार ४ सय ९६ वटा टेष्ट भएको छ । गत २४ घण्टामा ३ हजार ७ सय ९१ वटा नयाँ परीक्षण भएको उनले जानकारी दिए ।