काठमाडौं – गायक दीपक बज्राचार्य क्वारेन्टाइनमा बसेको आज ८ दिन भइसक्यो । पहिलेका ७ दिन रमाइलोमा बिते पनि सोमवारबाट सरकारले लक डाउन गरेपछि चाहिँ बज्राचार्यलाई केही तनाव बनाएको छ । किनकि, समयमा पानी पनि नपाइने हो कि भन्ने उनीहरूलाई चिन्ता छ ।

अस्ट्रेलियाबाट कन्सर्ट गरेर आएपछि राजधानीको बुङ्मतिस्थित एक घरमा उनीहरू होम क्वारेन्टाइनमा बसिरहेका छन् । दीपक बज्राचार्यसहित सिङ्गो ब्याण्ड क्वारेन्टाइनमा बसेको छ ।

टिमले क्वारेन्टाइनमा बसेर बोर भएका आफ्ना दर्शकलाई फ्रेस बनाउन फेसबूक लाइभमार्फत सा‍ंगीतिक प्रस्तुति दिएका छन् ।

लाइभ हेरेर बसेका दर्शकले दीपक बज्राचार्यलाई मन परेको गीत सुनाउन आग्रह गरेका थिए । बज्राचार्यले मंगलवार शुरुमा ‘सानी’ गीत गाएर दर्शकलाई लाइभबाटै मनोरञ्जन दिएका थिए ।

लाइभमा आएर यसरी क्वारेन्टाइनमा आएर गीत गाएको सम्भवतः यो पहिलो थियो । सोमवार पनि बज्राचार्य र टिमले फेसबूकमा लाइभ आएर गीत सुनाएका थिए ।

दीपक बज्राचार्यले क्वारेन्टाइनको समयमा दर्शक फ्रेस बनाउन लाइभ आएको बताएका छन् । उनले नेपाल सरकार, प्रहरी र जनताको चासोमा लक डाउन मा सहयोग गर्नै सबैलाई धन्यवाद समेत दिएका छन् ।