काठमाडौं– हवाई सेवा बन्द हुँदा जिल्लाका अस्पतालहरुबाट कोरोना भाइरस संक्रमणको शंका गरिएको नमूना (स्याम्पल) राजधानी काठमाडौंस्थित केन्द्रीय प्रयोगशाल पठाउन समस्या भएको छ ।

चितवनको कोरोना विशेष अस्पतालमा मृत्यु भएका युवकको थ्रोड स्वाब स्याम्पल सडकबाट पठाइएको त्यहाँका चिकित्सकले जनाएका छन् ।

पूर्वी तराईको झापाका प्रमुख जिल्ला अधिकारी उदयबहादुर राना मगरका अनुसार आइसोलेसनमा राखिएका एक बिरामीको परीक्षण नमूना केन्द्रीय प्रयोगशाला पठाउन सकिएको छैन ।

मेची अञ्चल अस्पताल झापामा एक जना आइसोलेसनमा र १६ जना क्वारेन्टाइनमा छन् ।

जनस्वास्थ्य कार्यालय झापाका फोकल पर्सन जीवन चौँलागाईका अनुसार गौरादह नगरपालिका एक जनालाई सोमबार आइसोलेनसमा राखिएको हो । उनी हालै कतारबाट आएको जनाइएको छ ।

झापाको नमुना स्वाब एम्बुलेन्समार्फत धरान पठाएको र धरानस्थित बीपी कोइराला स्वास्थ्य विज्ञान प्रतिष्ठानमा संकलित समेत गरेर प्रतिष्ठानकै एम्लुलेन्सले काठमाडौं ल्याउने जनाइएको छ ।