काठमाडौं– राष्ट्रपति विद्यादेवी भण्डारीका विज्ञ (राजनीतिक) सल्लाहकार सुशील प्याकुरेलले राजीनामा दिएका छन् ।

प्याकुरेलले आफ्नो राजीनामा पत्रमा राष्ट्रपति संस्थाको विज्ञ सल्लाहकारको रुपमा औपचारिक परिधिभन्दा बाहिर रहेर काम गर्नुपर्ने आवश्यकता महसुस गर्दै राजीनामा दिएको उल्लेख गरेका छन् । तर, राष्ट्रपति भवन शीतल निबास स्रोतले भने अग्नि सापकोटालाई सभामुख बनाउन लागिएकोप्रति असन्तुष्टि जनाएर प्याकुरेलले पदबाट राजीनामा दिएको बताएको छ ।

प्याकुरेलले अग्नि सापकोटालाई सभामुख चयन गर्ने विषयमा आपत्ति जनाउँदै आएका थिए । प्याकुरेल संस्थापक रहेको अनौपचारिक क्षेत्र सेवा केन्द्र (इन्सेक)ले सापकोटालाई सभामुख बनाउने निर्णयको औपचारिक रुपमा नै विरोध जनाएको थियो ।

मानव अधिकार आयोगको पूर्व आयुक्त रहिसकेका प्याकुरेलले द्वन्द्वकालीन घटनासँग सम्बन्धित (कर्तब्य ज्यान)को मुद्दामा सापकोटालाई विपक्षी बनाएर २६ चैत २०७२ मा सर्वोच्च अदालतमा रिट समेत दायर गरेका थिए ।