काठमाडौँ – तत्कालीन जनमुक्ति सेनाका तेस्रो डिभिजन शक्तिखोजका ब्रिगेडियर कमाण्डर गोविन्दबहादुर बटालालाई रामहरि श्रेष्ठको हत्यामा सफाइ दिने सर्वोच्च अदालतको फैसलाविरुद्ध पुनरावलोकन निवेदन दायर भएको छ ।

महान्यायाधीवक्ताको कार्यालयले गत भदौमा फैसला पुनरावलोकनका लागि निवेदन दिए पनि अहिले मात्र यसबारेमा खुलासा भएको हो ।

रामहरि श्रेष्ठको हत्या मुद्दाको फैसलामा अदालतले आफैले स्थापित गरेको नजिर वा कानूनी सिद्धान्त प्रतिकुल भएको पुनरावलोकन निवेदनमा उल्लेख छ ।

सर्वोच्चका न्यायाधीशद्वय तेजबहादुर केसी र टंकबहादुर मोक्तानको संयुक्त इजलासले २०७६ फागुन १८ गते बटालालाई सफाइ दिने फैसला गरेको थियो । ‘प्रतिवादी जीवित भन्ने गोविन्दबहादुर बटालाले कुटपिट गरेको भन्ने मिसिल संलग्न कुनै पनि तथ्य प्रमाणबाट खुल्न आएको देखिँदैन,’ फैसलामा भनिएको थियो ।